التقى متعب ومنحوس بعد الاعلان عن القائمة المشتركة الثلاثية، وكانت ابتسامة عريضة ترتسم على محيا متعب، بينما علامات القلق بادية على وجه منحوس، فأراد متعب نشر جو من التفاؤل على لقائهما، لذا بادر صديقه قائلا:
- ها يا خيا منحوس، لا تقللي انك مش مبسوط، هاي الأحزاب الثلاثة استجابوا لمطلب ورغبة الناس بالوحدة أخيرا.
فأجابه منحوس دون أن تتغير قسمات وجهه:
- صحيح خيا متعب، بس بيني وبينك بعدني مش مرتاح!
فرد عليه متعب متسائلا:
- ليش يا منحوس؟ مش هادا كان مطلبك كمان؟ قصدك انو ما تمت الوحدة الرباعية؟ ولا بدنا نبدأ نضع العصا بين دواليب العجلة؟
فعاد منحوس لينفي التهمة عنه:
- لا مش القصد. الموحدة وفهمنا انو ما كانت رغبانة الوحدة من البداية واقتنعنا بالقائمتين، لكن كان هذا الجدل والأخذ والرد الو داعي. يعني هذا الخصام والخلاف على المقاعد، زعزع ثقة الناس بالأحزاب، ولا كيف انت شايف؟
- صحيح، لكن كل شيء قابل للإصلاح، وان شالله الناس ما بتخذل المشتركة في التصويت، خاصة وانو هذه كانت رغبتهم ومطلبهم.
- ماشي يا خوي يا متعب، لكن القصد بدل ما الناس تعبر عن رضاها وارتياحها، ازدادت أصوات النقد والتهجم واعلانات المقاطعة، كأنه اجت الحزينة تفرح ما لقت مطرح، والا انت مش متابع صفحات التواصل والتفاصل؟
- أي والله متابع وهذا ما يسبب وجع الراس، وانطبق علينا المثل اللي بقول: من وين نبوسك يا قرعة؟ اذا اختلفوا وتفرقوا بتقوم القيامة، واذا عادوا واتفقوا وتوحدوا، تنطلق ألسنة النقد والتهكم والتشكيك.
- عشان هيك أنا قلقان خيا متعب ولازم ننهي هالخلافات عاد ونعود لالتزامنا باسقاط الحكومة اليمينية الفاشية، بالتصويت للمشتركة أو الموحدة دون تخوين وتوزيع شهادات!
- معك حق خيا منحوس وهذا فعلا ما يشغل بالي، لكن فكرك شعبنا رح يخذل أحزابه، رح يتخلى عن مطلبه؟ ما رح يقدّر عودة الأحزاب للمشتركة مرة أخرى؟
- أنا متأكد انو شعبنا على العهد رغم كل الظروف والنقاشات الطويلة، وانو بعرف منيح اذا ما شدينا الهمة هذه المرة، رح يرجع نتنياهو ورح تعود الحكومة الفاشية، وهذه المرة اقرأ الفاتحة على وجودنا.
- تف من ثمك يا زلمة ما وصلنا لهون.. بس ما بمنع انو أنا قلقان.
- يا رجل رح تخرّب عليّ الفرحة بإعلان المشتركة، خلينا نختم نقاشنا بجو من التفاؤل.
- أنا متفائل زيك بس هذا ما بمنع اني قلقان.. وبما انو ما بدي أفسد عليك الفرحة زي ما بتقول، المرة القادمة بحكيلك ليش أنا قلقان.
- ماشي .. خليها للمرة القادمة، وتعال نشرب فنجان قهوة احتفالا بعودة المشتركة.
[email protected]
