لا المَعرّي فينا...

وْلا إبِن خَلْدون

وْلا النّابْغه بِنْفوسْنا

في مَعْلَمو...

تُهْنا بْمَتاهات السّحِر

وَسْط الظّلام

روح العَصِر يا ويلْنا

ما نِفْهَمو...

طِرْنا بِدون جْناح

فِ هْبوب الرّياح

لا الماضي نافِع

وَلا الحاضِر نِقْحَمو!!..

نِمشي على شْمال الوطن

وِلا اليمين..،..

لا شْمالو طِقْنا

وْلا يَمينو نُهْضُمو!

لو لَرْغيف الخُبِز

صدى... تَأثير...

لازِم بَقا هَالمَسحُقين

يِتْلَمْلَمو...

ييجو عَ شِكْل العاصْفِه

يْهِزّو القُصور..

تْعِمّ العَدالِه عَ الأرِض

شو يِنْعَمو،...،

وِان كان قومي هَالصّراع

وْعَالحَكي..

لِمْشَلّحين والأغْنِيا

ما يِسلَمو..

مِ السّيف لِمْسَلّط

على رْقاب الجميع

الكُل الكَليلي من القَهِر

بِتْألّمو...،

لازِم نِواجِهْ سوا

هيكي مَصير

ما نْخلّي حِجّه يُبْرُمو

الْ بِتْبَرّمو...،

إحنا على موجِه خطيرِه

مِقْبِلين

تَيّار جارِف للعَتِم..

ما أظلَمو...

يْعَبّي عْقول وْلادْنا

بْفِكْرو السّقيم

في حِقْدو يِرْمينا

وْفِ نار جْهَنّمو...

برنامج التّرحيل واقِف

عَ لِبْواب...

هذا اللي حَطّو طلّعو

من مَعْجَمو...